Bro. V. Lalneihkima
President Nursery Veng PYD
Zanin thlifim thaw heuh heuh chu a nuam hle mai, ka thutpuiin a zir nge ka thut hmun a fuh zawk pawh ka hre lo. Chhawrthlapui eng hian chhun bik a nei ngeiin ka hria, ka lunglai luahtu, Lungrun-i hmel chu a engno set a ka hriat chu. Mahse, a eng bik hauh lovang, hmangaihna vangin ka hmutha zawk em a ni. Hmangaihna vang bawkin ka la hmu tha zel bawk ngei ang. Ni e, a ni nen chuan hmangaihna par zu kan la dawt dun zel ang, a zunphurh a na em a ni.
Fam Laltanpuia khan “Hmangaihte lenna chu thlir hian a langsi lo, mahse engtiang pawhin kan kar lam hla mahse, ka thinlung hmangaihna leh ngaihtuahna te chuan, an chungah thlazarin a awmpui reng thin,” tiin a hmangaih a hmuh phak si loh tan a hmangaihna thu a hlan a nih kha. A ni tak a, hmangaihna hi sawi awl tak leh sawi fiah har tak si a ni. Hmangaihna hian fan ngai loh ram min fan tir a, hlimna nasa tak min thlen bawk thin. Mahse ka sawi tum erawh mihringte inhmangaihna ni lovin, Nunna min petu kan tana thihna hneha tho leh Lal Isua ngeiin a hmangaihte tan a nun a hlanna a ni zawk e. Hei erawh hmangaihna hlu ber leh ropui ber a ni.
Hringnuna pawimawh em em chu Hmangaihna hi a ni. Mahse, mihringte inhmangaihna hian a changin hlimna min thlen a, a changing tahna ruamah min hruai lut thin. Nimahsela, hring chan chhung tawite a kan inhmangaihna hian chatuan nun hlimna min pe lem lo tih erawh kan ngaihtuah phak thin lo fo. Kan inhmangaih a, kan hmangaih te tan engpawh tih kan inhuam a, annat kan phal ngai lova, hmangaihna vang vekin a chhe lai pawh kan inhmu mawi hram hram thin a nih kha. He leia kan hmangaihte tan engpawh tih kan inhuam lai hian tawp chin nei lova min hmangaihtu kan Lal Isua Krista hi ka hmangaih ti si hian a nat erawh kan phal bik lawisi a ni e.
Mi tu pawh hmangaihna tawnglo leh hmangaih nei lo kan awm kher awm lo ve. Hmangaih neih hi thil zahthlak ni hek lo, chu chu siamtu min siam dan pawh a ni reng a ni. I Johana 4:8-ah chuan, “Hmangaihna nei lo chuan Pathian a hre lo, Pathian chu hmangaihna a ni si a,” tih ziak kan hmu a. Pathian hria inti vek chu kan ni ngei ang. Lei leh van Lal ber meuh pawhin min hmangaihna vang a ni kan tan a nun a hlan ni. Nimahsela, chu hmangaihna ang chu tute mai pawh hian kan nei pha si lo erawh a pawi hle mai. Hmangaihna neih hi Pathian hriatna a ni a, Pathian kan hriat chuan a thupek kan zawm erawh a ngai a ni. Chu chu mitin ten kan hretel thin si lo a nih hi. He leia kan hmangaih te lakah kan tuiral zova, kan neih zawng zawng leh kan theihna zawng zawngte pawh chatuan nun hlimna min pe theitu lam a pe phal lovin, kan damchhung tawitea kan hmangaihte tan kan hlan zo a, a tawpah hmangaihtu dik tak a lo ni lo tiin natna min thlen leh si thin.
Siamtu min siam chhan hre lek lova he lei hmangaihna a kan that lai hun zawng zawng kan chen thin hi a pawi hle mai. Hmangaihte chu kan thlahlel a, kan ngai a, anbula awm nuam kan ti a, englai pawh a biak leh hnaih reng kan duh thin. Nimahsela, kan tan a nun hlantu min hmangaih avanga hrehawm tuartu chu ka hmangaih ti siin kan hnaih thei lova, a tan a hun hman pawh kan peih thin si lo.
Chuvangin, Pentecost thalai rual zawng zawngte lei hlimna um lova chatuan nun hlimna a puar khawp hmuh tum zawkin bei ila, dam chhung tawite atan hlimna um lovin chatuan nunna kan neih theih nan Siamtu siam chhan ang zel a hmangaihna nen rawngbawlin a Kohhran siam puitlinna hna thawk thar leh ila, tun aia nasa zawkin Pathian i hnaih sauh sauh ang u.
