“Kraws thu chu boral mekte tan chuan atna a ni si a; Keini chhandam mekte tan erawh chuan Pathian thiltihtheihna a ni zawk e.”
Lalduhthlana
Khawvel thiamna te, finna te, hriatna te, mihring thiltihtheihna te hmang hian Pathian rawng hi a bawl theih a, mahse, Kraws nun tel lo chuan vanram kan thleng zo dawn lo a ni.
Keini ringtute leh chhandam tawhte tan chuan Lal Isua Kraws kan put pui reng a ngai tawh a. Kraws thleng lova a nuam chin chauh a Pathian rawng kan bawl chuan boral mekte tan chuan atna a ni si a, tih ringtu nun kha kan nei tihna a ni a. Kraws-ah kan tuar ai a tuar a, keini ringtute tuar ve tur leh kan kal kawng tur a nihzia kan hmuh a kan hriat ve siloh chuan a dik famkim dawn lova. Chhandam mek kan nih tawh avangin sualna zawng zawng kalsanin, hlimna leh lawmna lam chauh um lova, hun harsa tak karah pawh Kraws put puitu rinawm, rawngbawltu diktak leh thlarau thianghlim dik tak dawng mi, van nun nei mi, kan nih a ngai a. “Kei erawh chuan kan Lalpa Isua Krista Kraws lo chu ka chhuan loh tur zia mai chu, chumi zarah chuan khawvel hi ka tan khenbeh in a lo awm ta. Keipawh ka tan khawvel hi khenbeh in a awm a ni.” (Galatia 6:14) ah kan hmu a ni.
Kraws-ah chuan khawvel chu keima tan a che thei tawh lo a. Keipawh khawvel lamah ka che thei tawh lo titu nun, kraws nun, kraws thiltihtheihna, kraws putu nun awmze diktak kan neih angai a ni.
Kraws chu mahni inphatna te, channa te, tlawmna hmun te a ni a. Chu thu chu keini mihring rilru sual tak pute chuan kan duh loh ber a ni. Mahse, pathian khawngaihna changtute, a chhandam mekte tan erawh chuan chu thil duhawm loh ber chu duhawm bera kan pawm a ngai ta tlat si a ni. Pathian khawngaihna avanga chhandam kan nih tawh si chuan kan nun kawng zawh lai mekah hian Pathian thu ang zela Kraws kan put pui chuan, kan rawngbawlna kawng engkimah malsawmna tam takin min vur dawn a ni. Lal Isua ringlotute chuan he Kraws thu kan sawi hi anzawmin anpu ve ngai dawn lo a. Tap chunga Kraws kawng zawh tang tang te, hrehawm tuar tang tangte zinkawng chu he leiah hian tawp mahse, Vanram anpanna kawngah chuan tap chung ni tawh lovin hlim takin vanram an pan thei dawn a ni.
Kan hla thu chuan, “Ka pa hnen ka thlen hun chuan ka khualzin kawng ka hrilh ang nga, ka mittui min hrukfai sak tawh ang a, Ka pa i hnen lo haw ka nghakhlel” a ti vawng vawng mai a ni. Mittui nen kan zinkawng zawh mahila, he leiah hian min chhandamtu hmel duhawm kan hmuh hun chuan hlim takin van kawng kan pan tawh dawn a ni.
He khawvel kan khualzinna ramah hian, Pathian rawng hi bawl zawh tawh a awm thei dawn lova, hmabak tamtak kan nei . Chu kan tih tur, kan chanvo Lalpa hmaa rawngbawlna hrang hrang kan neih hi, kan thih hunah hrilh tur kan neih ve loh chuan, Pa hnenah kan lut ve thei dawn lo a ni. Chuvangin, pathian hnen thleng ngei turin Kraws kawng nun hi tun aia nasa zawk a zawh turin Lalpa rawng i bawl zual zel ang u.
Lalpa’n malsawm rawh se
