T. Lalzekima
Tresurer HQRS Bial PYD
Kan naupan laia (han ti ve lehchhawng ila) kan thenawmnu’n (hmun dangah an insawn ta a) a fate a chhanna lama mittui tla pur chunga kan haw zin zia kha…. Chumai ala ni na’ng! naute velh chin avanga chhungte hauh leh vuak kan tawrh thin lai kha, han ngaihtuah let chang chuan lung te pawh a tileng leh lawisi a! A ni, kan naute leh kan fate duat hi chu alo na a ni ange, an thiam nge thiamlo tih pawh ngaihtuah hmanloa an thiante han hauh mai leh kut han thlak mai duhna alo awm thuai thin a nih hi.
Mizote hi kan inthenawm-khawvenna kawngah hian thil hotea kan ngaih, mahse chhungkua inthianthatna emaw inhmelmak tir theitu hi a awm ve tlat mai. Hetiang hian entirna pe tai la – Ka naute hian fanu an nei a, kan chhungkua chuan kan duatin, kan hmangaih ve khawp mai. An thiante nena an inkawm, mittui tla chunga anlo haw hi chuan han thinrimpui mai a awl thin. An thiante kha han hauin kut han thlak ta mai ila, an chhungte’n anlo hria anga an thinrimpui ve leh si anga. A tukleh maiah naupang hlim taka an inkawmho leh laiin, nu leh pa, chhungkua, thenawm-khawveng, inhmuhthiamlohna thlentu a ni thei thin.Chuta tanga ka sawi duh chu hei hi a ni ta a ni – ‘Mi tumah hi insawifiahna hun pe hmasa lovin thiamloh chantir ngawt suh’.
India hi khawvela mipui thlan sawrkar ram lian leh zau ber a ni a, chu ram chuan ramchhung inrelbawlna’n dan chi hrang hrang a siam a, chu’ng dante chu India ram Danpui ( Constitution ) in a kaihruai a. Mizote hi India rama kan awm chhung chuan India khua leh tui kan ni a, Dan thuhnuaia awm kan ni. Chu Dan chuan mihring nunna leh zalenna a dah pawimawh em em a, thil tih mil zela ro relsak hi a tum ber a ni.
Hetiang hian entirna pe ta ila. Lala chu Mawia kutpalh tuarin a thih phah a, Mawia chuan tual a that tihna a ni. Dan hnuaiah chuan tualthat chu thi tur emaw, damchhung lungin tan emaw, kum bithliah zat tan tir emaw/leh pawisa chawitir theih a ni. Mi tam tak chuan Mawia chu a na thei ang bera hrem phutin roreltute kan nawr ringawt maithei e. Nimahsela kan Dan sawi hnuaiah chuan Mawia khian a thiamthu sawina’n hun tha tak a nei phawt tur a ni. Chutiang hun a neih hnuah roreltu chuan Mawia chungthu chu a phu ang tawkin a relsak ang. Heti zawng hian ngaihtuahna seng zui teh ang. Genesis kan chhiar chuan Pathianin lei leh van, mihring leh thil tinreng a siam thute, Adama leh Evi bawhchhiat thu nen kan hmu a. Genesis 3:9 “…… a hnenah, “ Khawiah nge i awm?”…” Mihring taka han ngaihtuah chuan kan Pathian hian zawhna awmlo tak a zawt niin a hriat theih awm e. Engkim siamtu leh engkim chunga thuneitu, engkim hmutu Pathian chuan Adama awmna chu zawh hranpa ngai lovin a hre ngei ang. Tin, Gen. 3:11(…”Saruak i nih tuin nge hrilh che? Thing rah ei loh tur ka tih tlat che kha i ei ta a ni maw?…) zawhna pawh hi tul lemlo tak niin a ngaih theih ang. Engkim tithei Pathian chuan a thil siamte chungah chuan tha a tih angin ro rel sela, tu-pa sawisel thiang a nih dawnloh nen… Nimahsela kan Pathian hian a mihring siam, Adama chu a thiamthu insawifiahna hun a pe a nih chu. Kan chunga roreltu te hi Pathianin a hun mil zelin min pe a, chu’ng roreltute dan siam chu kan zawm tur a ni. Tin, mi tupawh, an chungthu kan relsak emaw, thiamloh chantir duh hiala rilru kan pu a nih pawhin mahni duhdan leh kan hamthatna tur anga kalpui mai lovin, an thiamthu sawina hun i pe thin ang u. Chu chu khua leh tui tha nihna, rorelna dik thlentu a nih rualin, a Pathian Thu em em si a.
