Bro Lalzawmpuia
President Hqrs Local PYD
Sam 84 : 1-4 “Aw sipaihote Lalpa, i awmnate chu a va duhawm em, ka nunna hian Lalpa biak in hung chhung kawtlai te chu a ngai em em a.” Bible chang kan tarlanah khian Biak in a awm chak thu kan hmu a, kei ni thalai te hi he khawvelah hian enge kan duh leh kan chak zawng, khawvel changkannate hian kan rilru ngaihtuahnate hi a ei chhe ve em? Kan ei leh bar zawnnaah te hian duhamnate hian kan nun a ei chhia em? Pathian maicham thleng hman lo khawp hian sum kan duh luatah hian kan pha fo thin em? kan duh leh chak zawng chauhah hian Biak in hi kan thleng thin nge, ngaiah kan nei zawk, kan bible chang tarlanah khian engtin nge a in ziah kha, ka nunna hian Lalpa Biak in hung chhung kawtlaite chu a ngai em em a ni, a chauh phah hial a, tih kan hmu.
PYD-te hian Lalpa Biak in hi ngai khawpin kan kal em, Biak in ngai ngawih ngawih tur hian kan inhmang tawh em, kan thinlung zawng zawng hian Lalpa hi au ila, thlarau thianghlim kan chan theih nan te, Pathian thutak ah kan chian theih nan te, kohhran kan hmangaih leh zual theih nan te hian Biak in ah hian kal tam ila, kan nunah harsatna lo thlen chang chauh a Lalpa kan auh te hian min chhang duh a ngem, damnate, malsawmnate kan changa kan thawhchhuah emaw kan ti thin a, Pathian hi kan hrelo leh mai thin, chuvang chuan malsawmna kan dawn te hi Biak in min thlen tirtu lo ni fo thin sela, engpawh kan chhungkuaah lo thleng pawh nise, Biak in ah hian tawngtai in kal thin ila, kan nun te hi a lo hlim thin a nga, kan taksa leh rilru kan ngaihtuahna hian Biak in hi a thleng fo dawn a lo ni.
Pathian hnenah hian tawngtai tam ila, i maicham bulahte chuan vamur pawhin bu a nei a, no dahna turin tih kan hmuh ang hian kan chhungkua hian a Biak in hi kan thleng thin em, kan nu leh pa te hian kan fate hi Biak inah hian kal tam pui ila a, Biak in kawt vel a kan fate, kan tu te an awm hian kan thla a muang thin em, sava te pawn no neih nan an duh a nia, a chhan chu Biak in ah hian tumahin an tina dawn lo tih anhria a, anthla a muang em em mai, chhungkua a maicham thlen te hian chhungkaw boruakte hi a lo nuam em em thin a lo ni. Chuvang chuan thalaite hi in enfiah ila, Biak in thlen chakna rilru nei ila, nu leh pa rilru ti hahtu ni lo ila, Biak in thlenpuitu ni zawk ila, i in a awmte chu a eng a thawl e nang chu an fak fo ang che tih ang hian Biak in kan thlen tam a, Pathian kan fak tam phawt chuan kan rilru ngaihtuahnate a lo hrisel a nga, Biak in kan thlen tam chuan Thlarau thianghlim pawlnate kan dawng a nga, kan nunna hian Lalpa Biak in hi a lo ngai em em dawn a lo ni. Lalpa’n malsawm rawh se
