Andy Lalramnghaka Royte
Secy. MSVT PYD
Leader tih thumal hi a awmzia chu kan hre theuh awm e. ‘Lead’ tih chu hmahruai tihna a ni a, ‘Leader’ tih awmzia chu hmahruaitu tihna a ni. Chuan ‘Leader’ emaw ‘Hmahruaitu’ in a mi a hruaina hi Leadership tihna a ni. Leadership nei tha hruaitu chu Leader tha kan ti a, Leadership nei tha lo hruaitu chu Leader thalo kan ti leh mai a ni.
Kum zabi tam tak liamta atang tawh khan mipui hi kaihruaitu neiin kan lo awm reng tawh thin a lo ni. Kaihruaitu tello chuan mipui hi kan kal thiam lo thin a, ram emaw pawl emaw reng reng te hi chu Leader mamawh kan ni a, Leader tello chuan pawl hi felfai tak leh tluang takin a kal thei lo thin a ni. Tin, Leadership nei tha lo hruaitu awmna pawl pawhin hma a sawn thei ngailo bawk a ni . Chuvangin, Leadership nei tha hruaitu hi tupawh hian kan mamawh a ni.
Kohhranah pawh hian Leader leh Leadership nei tha hruaitu hi an pawimawh em em a, Kohhran mipui ten kawng hrang hrangah hma kan sawn theih nan hian Leadership nei tha hruaitu hi kan mamawh thin a ni.
Khawvel Scientist-te zinga ka ngaihsan em em thin, India President hlui famta Dr. APJ Abdul Kalam Azad a khan Press Conference an neihnaah Leadership chungchanga a thu sawi hi ka hre reng thin, tha ka tih em avangin a thusawi tlangpui han ziah lan ve hrim hrim ka duh a ni. Pu Kalam-a chuan heti hian a ti, “Kum 1979 khan Satellite Launch Vehicle-ah Project Mission Director ka ni a, kan mission chu Satellite kahchhuah a ni a, vawikhat chu Satellite kap chhuak tur hian kan inbuatsaih mup mup a, mi tam takin min thlir reng a, chutia Satellite kahchhuah anih dawnah, a thlawk chhuak tep tawh tihah chuan Computer hian chu Satellite ah chuan thil fello a awm a, oil leak a awm a ni tiin kapchhuak lo turin signal a rawn pe a, mahse ka pawl te chu Satellite kap chhuak lui tur chuan thu ka pe a, mahse reiloteah Satellite chu sang tak pawh a thlawh hma chuan Bay of Bengal ah a tla ta a ni. Chutah chuan Leader tha tak mai Satish Dhawan a chuan Press Conference-ah i kal ang min ti a, kan kal ta a, chutah chuan press lam chuan zawhna tam tak min lo zawt a, a thenin min dem luai luai a, sum tam tak insenga mahse inseng thlawn a ni, in hlawhchham a ni tia min hauh luai luai lai chuan chu Leader tha em em Satish Dhawana chuan kei hi an hotupa ber, an chairman ka ni a, ka mamawhphurhna a ni a, keimah hi min dem zawk rawh u tiin a lo chhang vat a, Leader tha a nihna khan a nau ten harsatna kan tawh lai khan ama tihsual ni miah lovah mawh a phur ngam a, ka ngaisang hle a ni.
Hun a liam leh hret a, a kum leh 1980 ah Satellite dang kapchhuak turin kan in buatsaih leh a, chu Satellite chu engmah harsatna awm tawh lovin hlawhtling takin kan kap chhuak thei a, kan lawm em em a, min thlir rengtu ram mipui te pawh an lawm a, chutah chuan press conference neih leh a lo ngai ta a, kan hlawhtlin avang chuan press hmachhawn pawh chu ka phur ta viau a, kan pu Satish Dhawan-a chu ka sawm a, mahse a ni chuan ni love nangman press conference chu va hmachhawn rawh min ti ta a.
Chumi awmzia chu kha Satish Dhawan-a khan a nau ten harsatna, demna leh sawiselnate an tawhin a tihsual lovah mawh a phur a, mahse a nau ten hlawthtlinna an neihin hmingthatna lak a tum leh chuang lo a, hlawhtlinna thlentu chu ka naute hi in ni a ti hlauh thung zawk a ni. Chu chu a ni Leader tha chu” a lo ti a ni. He thu hi tha ka ti thei em a ka rawn tar lang a ni. Leader tha chuan a hma a sial ngai lo a ni tih te min hriattir nawn fo thin in ka hria.
Leader tha reng reng chuan an pawlin harsatna a tawh lai chuan mawhphurtu a ni tih a in hre tur a ni a, harsatna sukiang turin theih tawp a chhuah thin tur a ni. Tin, pawlin hlawhtlinna a neihin aman hmingthatna a la tur a ni lo. Chutiang ang Leadership hnuaiah chuan thawhhona a thalo thei lo thin a ni.
Leader tha chuan a mite duhzawngte a hre thin tur a ni a, an duhloh zawngte pawh a hre thin tur a ni. Leadership nei tha hruaitu chu a mite tan entawn tlak a ni thin a, a mite chu a kiangah an thlamuang thin a ni. Leader tha chuan thawhhona tha vawnnun te hi angai pawimawh em em tur a ni bawk. Thawhhona tha vawng nung thei lo hruaitu chu hruaitu tha an ni ngai lova, mi te rilru hneha mite rem thiam tak mi annih angai a ni. Kohhranah chuan kan leader-te hi kan Berampute an ni a, Pastorte, Upate hi kan berampu te an ni a. PYD-ah chuan PYD hruaitute hi member-te tana Berampute chu kan ni bawk a. Berampu/Leader tha ni tur chuan Leader kan nih chhante, kan mite emaw kan naute hian harsatna an tawk em, an lawm em, an thla a muang em tih te hi kan ngaihtuah fo angai a ni. Berampuin a beram pakhat bo a zawng a, a hmuh chuan a lawm em em a, a phur haw ang khan Leader chuan a tihtur leh a ngaihtuah tur dik tak a ngaihtuah thin tur a ni. Kan mite leh kan memberte dinhmun hre hauh lova Leader kan ni ang tih a hlauhawm khawp mai. PYD chuan thiltum a nei a, chu chu Krista tana sengkhawm tih a ni. PYD kan nih chuan Sengkhawm hna thawhna kawngah theihtawp kan chhuah tur a ni a, kan hruaitute pawh sengkhawmna hna anthawhna kawngah theih ang angin kan tanpui thin tur a ni. Mahni thiltum hre miah lo leh hma lak tum miah lo PYD member kan ni ang tih hi hlau ila, Leader te pawn engtin nge kan thiltum hi tihhlawhtlin a nih ang tih hi kan rilru ah awm reng se ka duh hle mai. Kan thiltum ngaihsak miah lova kan awm chuan kan dinchhan hian awmzia a nei dawn lo a, chuvangin kan tum hi tihhlawhtling turin kan zavaiin kan pawimawh a ni.
Leadership tha nei tur chuan quality tha tak tak kan neih angai a, mahse mihring hi tumah tha famkim leh fel famkim kan awm si lo. Abik takin Kohhranah phei chuan kan duh vangte, kan tum vang te, kan fin bik vang te, kan fel bik vang te ni miah lovin hruaitu dinhmunah te kan ding thin a, chuti anih chuan Leadership nei tha hi kan awm thei ngai dawnlo tihna em ni ang? Ni love. Mihring hi chu kan tha famkim lo vek a, mahse tawngtaina nen Pathian rawn chung leh Pathian kaihhruaina atang chuan Leadership tha neih theihna quality hrang hrang hi mihringin a lo nei thei dawn chauh tihna a ni. Abik takin Kohhranah thalai hruaitu tan chuan tawngtai tam te hi angai em em a, Pathian tello chuan tumahin mahni mihring finna in Kohhran hi a hruai thiam tak tak thei ngai lo a ni.
Leader tha ni tura quality neih ngai te hi, khing a chunga kan sawi bak khi sawi tur tam tak a awm ngei ang mahse kan hriat chin te a tlem em avangin tam tak kan ziak theilo a ni tih min hriatpui ka duh hle a ni. North Mizoram District a Headquarters Bial PYD te zingah hruaitu ni lai mek leh hruaitu la ni zel tur te kan ni hlawm a, hruaitu dinhmun te kan chelh hunah khing a chunga famkim lo tak leh thiam lo taka Hruaitu tha ni tura quality hrang hrang ka han tarlan tlemte hi zawm theuh leh nei theuh turin ka ngen a che u.
Lalpan malsawm rawh se
