Evan. R. Lalchhanchhuaha
“Tin beram vengtute chuan vantirhkoh hrilh ang ngeia engkim an hmuha an hriat avangin,Pathian chawimawi leh fak chung zelin an kir leh ta a”(Luka.2:20)
Kan Lalpa tisa lenlai niah hian berampute chu puan ina chengin hmun hrang hranga insawn kualin emaw, awmhmun nghetin thingtlang khuaah emaw an cheng thin nia hriat a ni a.Thingtlanga cheng berampute chuan an khaw bul phulah an beramte an tlat tir thei a, hlobet alo tlem in an beramte chu nipuiah tlangsang lamah an tlat tir a, thlasikah phai lum lamah an tlat tir ve leh thung thin.
Khawchhungah an awm ve hman meuh lova, an hun tam zawk chu an beram ven nan an hmang a, ramsa leh rukrute laka an beramte venhim chu an hna a nih a vangin Sabbath ni pawh an serh hlei thei lova, sakhaw serh leh sang thilah an in hmang thei lo va, mi hnuihnung leh sakhaw lam ngaihsak lutuk lote thawh chiah an ngai a ni.
- Engvangin nge berampute hnenah puan a nih?
Chanchinthar mak leh danglam tak chu sakhaw mi leh puithiamte hnenah ni lovin berampute hnenah puan a ni tlat hian ngaihtuahna a ti thui hle mai. Puithiamte hnenah hrilh ni ta se, ran chaw pekna thlenga mu chu Israelte nghahfak Messia (Krista) a nih an ring thei hauh lovang. Vantirhkohte thusawi chu um zui nghal mai lovin, a rintlak leh tlak lohte an chhut tê tê anga, anmahni ni lovin tute emaw a enfiah turin an tir duh ngeiin a rinawm. Lalpa laka intulut lova amah ngai lo leh hmangaih lo, inti sakhawmi leh intifelte hnenah Lalpa hi a tlangnel ngai lo. “Nimahsela Isua chu an lakah angampa lo,mi zawng zawng a hriata,mihring thu tumah a hrilhfiah a ngaihloh vangin;amahin mihring chhunga awm apiang chu a hre sia(John.2:24-25).
Berampute chuan an thudawn ang ang chu an ring nghal dawn a ni tih Lalpa’n a hria a, an hnenah tisaa a lo channa thu thar danglam tak hi vantirhkohte a rawn puantir ta ni. Lalpa ring ngam mi kan nih chuan kan hnenah a cheng ve ngei ang.
- Zui ngam angai
Beramputen an hnena vantirhkoh rawn inlar an hmuh te, an hnena thu an rawn sawi an hriatte chuan an dinhmun atangin an han chhut ang a, phu loh ngawih ngawihin an in hre ngeiin a rinawm. Davida khuaa chhandamtu lo piang chu an hmuh huna an hriat theih nan chhinchiahna hrilh an ni a; ” Nausen puan atuam,ran chaw pekna thlenga mu” tiin. Kal nghal an ti tlu a, an kal nghal ta bawk. An kal hlana an beramte awm dan tur lamin an rilru a tibuai pha lova, rukruin lo ruin ramsain lo seh sela, an dinhmun a awhawm loh khawp ang le!!
Mahse,chung chuan kal lo turin a uai bet zo ngang lo….Eng dang zawng aiin ” Nausen puana tuam, ran chaw pekna thlenga mu” chuan an thinlung a pawt a, hmuh an duh, an thudawn chu an zui ngam a ni.
Malsawmna thar dawng tur chuan Lalpa zui ngam a ngai a, amah châka tuihal nih a tul. “Felnaa riltama tuihalte chu an eng a thawl e; an la tlai dawn si a,” (Matt.5:6). Isua hmingin Baptisma i chang tawh em? Thlarauvah i piangthar tawh em? Zui la,ring la, chang la, piantharna kawng chu zawh rawh. Fiamthu thawh nana an hman che emaw, an hmusit che emaw, mak an ti che emaw ngaihtuah si se lovin Lalpa zui ngam rawh. tah a tul emaw, bawhkhup a tul emaw pawh nise ti zel mai rawh, malsawmna thar i dawng zel dawn si a.
3. Pantu chuan an hmu
Berampute beram venna atanga Bethlehem khua hi engtia hla nge a nih ang? An kal thuai thuai a,Mari leh Josefa-te nen, Nausen puana tuam ran chaw pekna thlenga mu ngei an hmu ta, an va hlim dawn tak em! Josefa-te nen thil awmdan an sawi ho lai hian an zingah tel ve ava’n chakawm em! Hlimna, lawmna, revival chu a thleng ngei ang le… Lalpa hi a thu anga pantute chuan an hmu nge nge thin.
He hunpui lo thlengah hian a lawmna programme-ah emaw tisa lama an tih krismas velah emaw i rilru nghat lovin, he hunpui lo awm chhan zawk Lalpa tan i thinlung leh rilru buatsaih la, kumtluan a i thawhrimna zawng zawng ata i rilru leh thinlung chawlh hahdam tir la, Lalpa hi pan la, amah mawlh hi beisei rawh. Setana bumna thangah awk suh. |hiante nena intih hlim neih a, Lalpa kohhrante hnuchhawn zawnga hun i hman chuan rei lote hlimna leh nawmna chu i nei mahna, mahse, a hnu lam ah lungngaihna thlen tu che a ni dawn si a.
I taksa peng tinreng kha kumhlun tura duan a ni lova, second tin in i tawpna lam i pan mek a, i invui liam mek a ni. Chuvangin, Lalpa nen in intawk a, thlarauva chhun khaha i awm emaw, siamthara i awm emaw, thlarau thilpek thar i dawng emaw a nih chuan i tan KRISMAS theihnghilh theih tawh ngai loh tur a ni ang. Chutiang tur chuan Lalpa pan rawh le.
- A ngaiah (A thar ni si)
Berampute chu Pathian fak leh chawimawi chung zelin an kir leh a. An awmna hmun ngaiah an beram venna hmunah bawk an kir leh ni ngeiin a lang.
Kan awmna hmunte kan rilru leh thinlung awmdan a zirin a ngai pawh nise, a danglam daih thei a. A nuam zual emaw, a hreawm zual emaw a ni thin. Pangpar te, thla leh Arsi êng te, zing ni chuak leh a tla turte hi a entu mihring rilru leh thinlung azirin an lan dan a danglam thin. Berampute pawh an hnathawhna ngaiah kir leh mahse, a hma nen chuan danglam an ti tawh hle ngei ang. Krismas i hmang zo ang a, zing leh tlai tin chaw chhum a ngai lehin thleng sil a ngai leh ang a,i awmna leh chenna thawhna ngaiah i awm leh dawn.
Krismas laia kohhrante inpawl khawmna lam kalsan zawnga hun i hman chuan i nun chu a hreawm hlein ka ring. Mahse, Lalpa hnen ata Thlarau malsawmna i dawng thar emaw a nih erawh chuan Pathian fak leh chawimawi chung zelin nitin nun i hmang chho ngei ang. Engkim hi i tan a lang thar dawn a ni. I thawhna hmun leh hunte chu pangngai nimahse, Lalpa malsawna vangin nangmahah chuan a thar vek in a lang dawn a ni.
Tichuan, he hunpuiah hian thinlung zawng zawnga Lalpa beisei a, amah i pan phawt chuan malsawmna thar i dawn ngei ang. Inbuatsaih la, i thinlung leh rilru kha Lalpa tan tifai la, a tan in pe rawh. I hnenah thu a rawn sawi dawn si a.
Lalpan malsawm rawh se
