Bro MS Dawngliana Ralte
President Msvt PYD
Luka 10 : 30-35, 1 Johana 3 : 16-18.
Mi tu emaw Jerusalem khua chhuahsana Jeriko a kal, suamhmang tawk hi tunge anih chiah sawilang lo mahse, tu emaw a tih avang hian tun hunah chuan mi zawng zawng kan ni thei a, PYD chauh nilo kohhran member zawng zawng tihna a ni thei ang. Jerusalem khua hi eng vanga chhuahsan nge anih chhan hrang hrang awm thei karah hetiang zawnga sawi hi ka duh a. Jerusalem chu an Inpui Pathian an pawlna ber thlarau chaw an lakna hmun pawimawh em em a ni. Chu hmun an chhuahsan atanga Suamhmang tawk a ni tih kan hre vek ang khan kei ni pawh Lalpa nen kan inpawlna hmun ata awm lo a, Biak buk Lalpa nen kan inpawlna ata keimahni duh leh mamawh chak zawng ti tur a kan vah chhuah hian kawng lakah eng harsatna pawh kan tawk ve thei dawn a ni.
Suamhmang tawka khan kalpui nei se harsatna atawk ang em? Han ti leh ila, ni e, kan chhuahpui kan kawm leh, Pawn lama kanlo awm anih pawn kan thian kawmte pawh Lalpa mi, Piangtharte, Lalpaa michak zawkte kan kawm hram hram em? Kan mi leh sate kan kawm avan pawimawh em!? Kawng lakah harsatna thlemna hrang hrang kan lo tawk anih pawn, setana hian min ngam dawnlo a ni. Mi pakhat aichuan pahnih chu an chak zawk si a.
Awle, suam a nih khan silhfen hlihsak vekin thi lek lekin an kalsan tih kan hmu a. Chutia a awmlai chuan Puithiam a lo kal a, tanpui lovin kawngsir lehlamah a hel a. Helaiah hian sawi belh duh tlem ka neih chu; Puithiam meuh pawn a tanpui duh lo a, ngaihtuah a thui duh hle mai. Israel hnam sawm leh pahnih (12)-ah hnamkhat tawp Levia chi an awm a, chumiah chuan Arona thlah ho Puithiamte hi Biakin chhunga serh leh sang khawihtu zing a mi a ni. Harsatna tawk thi lek lek pawh tanpui hman lo khawpa a awm hi eng rawngbawltu / puithiam nge anih ang aw: lo ngaituah chhunzawm ila. A hnuah Levia chi mipakhat a lo kal leh tih kan hmu a, hei pawh hian tanpui ahnekin kawngsir leh lamah a hel ve leh ta mai a. A chunga kan sawi ang khan Levia chi mite chu Rawngbawltu Sawmapakhat hmang leh chhiah anpek atanga hlawh la a, full time a rawngbawltu an ni a. Tichuan a tawpah Samari rama tu emaw zin kal an tih chu a lo kal a, a hmuh veleh a khawngaih em em a, a pemah chuan hriak leh uain a leih a, a tuam tih kan hmu a. Samari mite hi jentail; thlahpawlh, an hmusit em em an ni a. Mahse hetiang mi hian Hmangaihna chu a takin a lantir a, a van ropui em! Lalpa chu fakin awm rawh se. Rawngbawlnaa pawimawh em em chu Pathian mit hmuha tla na chu a taka lantir, hmangaih rawngbawl hna hi a ni. Tawngka a kan sawi inhmangaih tur tih lam a ni lo. Mihringpuite bula hmangaihna rawngbawlna hi a ni. Johana lehkhathawna kan chhiar ang khan, sum neiin kan unau lainatin hmangaih silo ila, Pathian hmangaihna keimahniah a awm lo a ni. Thu chauhva hmangaihtu ni lo a, thiltih leh tihtak zeta hmangaih rawngbawl hna thawk tur kan ni a. Bible in, “Nangmah i inhmangaih angin i vengte i hmangaih tur a ni” tiin min hrilh a. Kan chhungkua kan inhmangaih ang mai hian, kan unau kan rawngbawlpuiten eng harsatna nge anneih, engah nge tanpui anngaih? Kan theih tawka kan inchhawmdawl hi Pathian duhzawng tak ani zawk a ni.
Thuhrilh theihna thuruk zawng zawng hriain, tlang sawn theihna khawp hial rinna nei mahila Hmangihna kan neih si loh chuan engmah lo mai kan ni dawn a ni. Hmangaihna dik chu Samari mi hian a neih avangin engtiklai pawha Pathian hman theih turin a awm a, Thlarauah leh Pathian thuah aawm reng angin kei ni pawh nihna chelhin, Rawngbawltu/ Puithiam kan ni lo mai thei, PYD kan nih chuan mi hmuhsit leh engahmah ngaih vak loh pawh kan ni thei, mahse midangte hriat loh pawha Lalpa hmantlaka kan awm reng chuan, Samari mitha ang hian kan tlingmai zawk a ni.
Chuvangin unaute u, Kan inngaihsaka, kan in hmangaihna hi thiltihin a zui chuan Rawngbawlna pawh a chakin anung anga, kan inngeih leh zual dawn bawk a ni. Unaupa, unaunu, kan tih hi Pathian atanga chhuak hmangaihna tawngka lo nise, bial chhung member tin hian in siamthatna tur kan nei vek tih pawm ngam ang u. Biakin leh a velah chiah lantir lo a kan luanchhuah hi Lalpan min duh a, kan awmhran pawhin hmangaihna a zual zel ang a, kan awmho hian a ti chak leh zual dawn a ni. Chutichuan Bial PYD chauh ni loin Bial chhunga member tinte kan inpumkhat zual deuh deuh dawn a ni.
Lalpan malsawm rawh se
