“I RAWNGBAWLNA KHA HLEN RAWH”

— T. Upa B. Lalremruata, Hqrs Bial PYD Secretary

Pathian rawng kan bawlna kawngah hian kawng tam takin kan hnathawh leh kan rawngbawl dan a inang lo theuh va, rawngbawlna pawimawh bik a awm thei tak tak loh ni hian ka hre thin. Thenkhat chu Kohhran ho enkawltu – Pastor, Upa, TualUpa te leh Department hrang hranga hruaina hna thawktute, thenkhat chu inkhawm zan hmaih ngai lo leh ngai pawimawh em em te, thenkhat chu hnatlan ni khuaa tlanchhe ngailo te, thenkhat chu thawhlawm khawn ni khuaa sawisel miahlova pe mai mite, thenkhat khuang vuaa hla lak thiam em em te, thenkhat thusawi thiam em em maite, a tam mai; kan sawi seng lovang heng bakah hian sawitur a la awm nual thei awm e. Lalpan ama rawng kan bawlna tur atana theihna min pek theuh hi chhawm nung zela, kan hmaa tih tur awmte chu kan hlenchhuah zel hi a pawimawh hle mai.

Rom 12:4 ah chuan “Taksa pumkhatah peng tam tak kan nei a, peng zawng zawng thiltih erawh chu a inang lo va” tih kan hmu a. Ni e, Kohhran (Local Church) pakhatah pawh hian rawngbawlna tur kauki hrang hrang kan nei teuh mai, kan taksaah peng tam tak a awm a, an hnathawh a inang vek lo ang bawk hian. Chung taksa peng hrang theuh hnathawh inang lo tak tak te chuan an hma zawna tih tur awm kha an thawk mai thin a, midang tih tur lo tih ve an tum ngai lo. Hnar chu thawkna, Oxygen hip luhna tura siam a ni a, mahse mit hian hmuh nan ringawt ka thawk a, Oxygen ka hip lut ve duh tawh ti se la, a hnathawh tura Pathian ruatsa a nih loh avangin Oxygen kha a hip lut ve ringawt thei lo. Chutiang chiah chuan Lalpan kan rawngbawlna tur hrang hrang min pe a, Thusawi thiam tak hian khuang ka vaw ve duh tawh ti ngawt se la, Lalpa pek a nih loh chuan a zai hleih theih lovang, kohhranah hian Lalpan ama rawng kan bawlna tur atan hian talent hrang hrang min pe a (1 Kor 12 :28), tirhkoh hna thawk tur te, thuhriltu atan te, zirtirtu atan te, tihdamna hna thawk tu atan te, mi tanpuina hna thawk tur atan te, rorel thiamna te, tawng chi hrang hranga thusawi theihna te, chung te chu mi chi hrang hrang hnenah pek theuh kan ni a, (1 Kor 12 :27) “Chutichuan, nangniho hi Krista taksa chu in ni a, a pengte in ni theuh bawk a.” tih ziak ang hian Lalpa kohhran tana kan thawhna kawngah hian Lalpan tih tur kan hma zawn theuhva min dah sak hi hlen chhuak ngei tura theih tawp kan chhuah zel hi a pawimawh tak zet zet a ni.

Chanchin tha hrilhna kawngah hian rawngbawlna sang tak chelh a, hmun hrang hranga rawngbawltu atan Lalpan nang leh kei hi min ruat lo a ni mai thei. Nimahsela tuna kan dinhmun theuh Lalpan min hunna theuhah hian thahnem ngai taka rawng kan bawl zel hi a van pawimawh em! Midang chan ram te, midang rawngbawlna te, a tha lo zawnga mahni chan ram nena tehkhin/khaikhin lo vin, Lalpan ama tana kan tih theih tawk tura kohhran hruaitu kal tlanga rawngbawlna hna (Chanvo) min pek te hi, theihtawp chhuah a ti hlawhtling tura kan thawh hian kan rawngbawlna theuh kha kan hlen chhuak dawn a lo ni.

Kawng engkimah sual lam kawng a ni emaw, tha lam kawng a ni emaw (Thaa kan ngaih kan member-te leh thawhpuite ti chak lo thei thil a awm fo mai) fimkhur takin Pathian rawn chung zelin ke pen ila, mi hmuhsitna a ni emaw, mi nuihsawhna a ni emaw, hah ni leh chauh ni a lo thlen pawha tuar hram hramin, Chanchin Tha (Isua Krista thihna leh phuma a awmna leh a thawhlehna) hril chung zelin, kan rawngbawlna theuh hlen chhuak zel turin i inbuatsaih ang u.

Lalpan malsawm rawh se.