Lalnunpari B.W
I Samuela 20:3 Tin, Davida chuan, “I pa chuan i mi khawngaih dan hi a hre chiang hle mai si a; ‘Jonathana chuan hei chu hre kher suh se, chuti lo zawng, a lungngai dawn em mai e,’ a ti a ni ang. Amaherawhchu, LALPA nunna leh i nuna chhalin ka sawi e, thihna nen kan inkar chu pen khat chauh a ni,” tiin a sawi uar leh a.
Kan thupui “Thihna nena kan inkar chu pen khat chauh” tih thu hi Lal Davida’n Saula fapa Jonathana hnena a sawi a ni a, mihringte hi kan lo pianchuah hian thi leh turin kan piang a ni tih hi chu kan hre theuh awm e. Mahse kan rilru luah bertu a nih loh mai bakah ngaihtuah pawh kan ngaihtuah tha duh lo zawk hial thinin a rinawm. Mihringte hi pianga thi leh tawp mai tur chu ni ila a ziaawm zawk awm e, mahse chutiang chu siamtu min din dan a ni hauh lova, kan thih chiah hian kan chatuan hun hian min lo hmuak ve chauh zawk a ni. Jakoba 4:14-ah chuan mihring dam hun chhung rei loh zia leh chhum reilote lo langa ral leh ta ang mai kan nihzia min lo hrilh a, kan chatuan hun tur nena tehkhin phei chuan mitkhap kar ang lek a ni, tiin a lo sawi bawk a ni.
Kan hringnun hman chhoh dan hi uluk taka han chhut hian kan hma hun a tana inbuatsaih nan kan hmang zo vek ni hian a hriat a, chanchintha Luka 12:16-21 kan chhiar chuan mihausa a tehkhian thu kan hmu a, chutah chuan mihausa pakhat hi a awm a, a hlawhtling em em mai a, a thawhchhuahsa buh leh bal dahna pawh chu tihlen belh hial ngai khawpin a hlawhtling a, hahdam taka awm a, a thawhchhuahsa chen chu a tum ta a, chutih lai tak chuan Pathian Aw a hre ta tlat mai. Mi a zaninah hian i thlarau anlaksak dawn che tiin Pathian Aw a hre ta a ni.
He tehkhinthu a ka rilru a lo lang pakhat chu keini Pentecost mite ngei pawh hi kan mimal nun theuhte inchhut ila, he khawvel thila kan rualawh lutukna te hian kan thlarau nun hi a ti chau ve reng em! Kohhranah a ni emaw, kan mimal nunah pawh nise, khawvel thila changkan kan tumna lutuk te hian Lalpa min hlat tir thei a ni tih hi kan hriat nawn fo a ngai a ni. Mihausa pa tehkhin thu a kan hmuh ang hian engtik lai pawh a thi thut thei kan ni tih hi kan hriat reng a pawimawh hle a ni.
Benjamin Franklin chuan “Kum za dam tur angina hna thawk la, naktuka thi tur angin tawngtai rawh” a lo ti a, chuvangin eng hunah pawh Lalpa tawk tura kan inbuatsaih a ngai tak zet a ni, eng hunah nge kan nunna a tawp dawn kan hre si lo.
Thupuan 22:12 “Ngaiteh, ka lo kal thuai dawn e; mi tin an thiltih ang zela pek turin ka lawmman ka hnenah a awm a” tih kan hmu a, kan nitin kan hun hman dan zawng zawngte hi kan vantirhkoh theuhte hian an chhinchhiah (record) zel a, nikin niah kan la hmu leh vek dawn a ni. Lalpa tan hian enge ilo tih ve tawh le? Tuna i awm ang khan Lalpa i tawk ngam a ngem? Thihna nena kan inkar chu penkhat chauh a ni si a. Lalpan malsawm rawh se.
