Bro Thanchungnunga Colney
Nursery Local
Kohhranah tlinglo taka kan lo thawh ve hram hram rah nge ka hre lo, Rabboni article huanga thu chhuah ve tura min sawm ve teh tlat. Thu thiam ka ni lova, min ngentuin min ngen thiam em vangte pawh ti ila, ka han thai ve rawih dawn chu a nia! A chhiartu tan eng ni lo mahse a ziaktu tan tal a hlu ve ang, dah that a tan tal pawh tiin.
Mihring rilru leh thinlung hi a thianghlim lo khawp mai tih hi, tu thinlung mah inhriattawn sak thei lo mihring hian kan hrechiang viau in ka ring, enge a chhan? Han ngaihtuah mah teh i thinlung kha! Mi thusawi eiloh neih rikngawt te, hmel tih theihloh kan lo nei ringawt te hi, thinlung thianghlim zia a ni i ti thei em? Chu chu mi tin hian kan nei vek ti ila kan sawi sual ka ring lo.
A hmel sawn ka pawi a sawi, ka kawmpeih hmel a pu lo, a mit men dan saw! A hmui awmdan saw tih mai maite, hmeltha vak lo tan a hrehawm dan turte ka ngaihtuah neuh neuh phah.
Kan Pathian thu chuan Jeremia 17:9 ah, “Thinlung hi thil zawng zawng aiin bum hmang ber, chhe lailet dêr a ni a; Tuin nge hrethiam thei ang?” Tiin a lo ziak a.
Thinlung hi ngaihtuah chian chuan a bawlhhlawh em em avangin, tithianghlim tur chuan Thlarau thianghlim kan mamawh a ni. (Galatia 5:22) Chu thlarau thianghlim chu nei turin theih tawp kan chhuah a pawimawh. Thlarau thianghlim kan chan a kan dawnna chuan kan thinlung pawh min tihthianghlimsak se.
Famkim lohna khawvelah hian khawlohnaa din, suala pai ka lo ni a,(Sam 51:5) misual chu ngaihdam an ngai thin angin keipawh, nangpawh ngaihdam ngai kan lo ni. Chu kan sualna chu engtiangin nge ngaihdamna kan chan theih ang?
Tirhkohte 2:38-ah ‘Sim ula, in sual ngaidam nan Isua Krista hmingin baptisma chang theuh rawh u;’ a tih avangin, kan khawvel pianpui sual leh kan nitin sual kemahnia bet tlat chu baptisma hmangin kan tlenfai, kan pianthar a lo ngai ta a nih chu.
(Johana 3:5) Tuiah leh thlarauva kan piantharna hian nun danglam min neihtir se, kan thinlung pawh min tihthianghlimsak sela.
Thil pakhat chu tui leh thlarauva piangtharte pawh hi a chak reng theih loh, 100% in mihring hi thlarauvah a khah reng theih loh, chuvang chuan, i phone-ah i battery 50% vel anih chuan, charge na tur i zawng ruai thin a ni tiraw?? Kan nula lam phei chu 80% aia hniam hian an dah ngai lo hrim hrim an tia, tak tak ni maw.
I thlarau thianghlim dawn pawh kha charge fo ang che, khawvel thil hian a chimpil palh ang che tih a hlauhawm, kan hna eizawnna hrang hrang kan thawk a, Biak in kan hlat tial tial a, kan tawngtai khat/tlem tial tial a; kan thlarau Battery kha a low vat loh nan tawngtaina hmang ten kan charge ve fo hi apawimawh a ni.
Tumkhat pawh kan hla zirnaah hian kan nula pakhatin, phone charge tur hi a rawn keng a, plug bula ka lo thut avangin min lo vih a ti a, a phone battery ka en chu a, charge a mamawh hmel ang aiin alo la ngah a, a zat phei chu sawi kher lo ila, chutiang chuan keini pawh hian thinlung thianghlim kan neih theihna tura pawimawh em em thlarau thianghlim a kan in chhun khah reng theih nan kan tawngtai tam a ngai hle mai.
Ni khata vawi khat em pawh tawngtai ngai lo ringtu, thalai PYD, kohhran hruaitu, LAD hruaitu, ka ni ang tih hi hawh u i hlau ang u. UPC ka nih chuan kan rau hle tur a ni. Rau hle tur tih hian lamtual a va lam ruih but but lam kha kan rilru in a kawk tlat ang tih chu ka hlau, lam ruih lam kha a thalo, lam ruih loh tur tihna ni lovin, kan lam rui bual buala, lam tualah kan let tawp tawp a, kan thlarau chan a reh ta maw tihah thuhriltu a dinga, lo mutthluk san leh mai mai nun hi kan nei ang tih hi i hlau ang u. Lamrui but but ila, lamtual ah te let tawp tawp ila, kan thlarau dawnna te hian thu tak zawng zawngah min hruailut se, chu thutak chuan kan nun hi khawvel mite lakah min ti danglam rawh se.
Rom 12:2 ‘He Khawvel dan ang hian awm suh ula; Pathian duh zawng, a tha leh lawmtlak leh, that famkim chu in hriatfiah theih nan, in rilru athara awmin lo danglam zawk tawh rawh u.’ Danglam tura koh Pentecost mite hian khawvel mite lakah hian danglamna tur tam tak kan nei. Ka sawi lang tel zuai duh; UPC-te chu an puitling, an pangai ve tawh; nupui pasal pawh kan in neih pawlh ve thei tawh, min tih hian kei chu ka rilru a ti na thin. Hawh u, nupui pasal neihna kawngah pawh i danglam ngam ang u. PYD tlangval chuan PYD nula ngei nupuiah i nei thar leh ang u. Kohhran dang aiin an lo chhe zawk, an lo zahawm loh zawk emaw, lehkha pawh an zirsang lo zawk hret anih pawhin thuthlung avang chuan i in ngaidam tawn ila, kan rilru hi tithianghlim ila, PYD tlangval, nula in whatsapp, social media kaltlangte a min lo bia anih chuan, ‘ava lerh’ ti mai lovin thinlung thianghlim tak puin nupui pasal tura inbiak kan zir te pawh hi a hun tawh.
‘UPC chu vanram kai tur kan ni’ kan in ti a, Pathian thu tidik kan intihnaah, Hmangaihnate, remnate, dawhtheihnate, zaidamna te vanah chauh chen tur a nilova, leiah pawh hian kan chen tlang ang a, kan nun chhuahpui tur a ni.
Chuti nilova vanram kai tum si, leiah inngeih chuang silo kan nih chuan a zialo khawp ang, lei a kan inhmangaih lohva kan in rem loh chuan vanah pawh kan inhmangaih thut chuang lovang, chuvang chuan leiah hian kan thlarau thianghlim chan hian thinlung thianghlim tak min puttir sela, rem loh leh hmangaih loh nei lo ila avan nuam dawn em. Kan mihrinna chuan min diriamtute, min ngainep tute, zah lo taka min ti tute, ngeiawm zei deuhva min ti tute, kan tlin lohna lai min sawilan len sak tute kha, a ngaidam thei bik lo, tih let leh thungrulh a duh thin. Kan mihring rilru a harsa, ngaihdam har kan tih em em hi, kan thlarau thianghlim chan hian kan ti reh in angaidam thei a ni tih hria ila a pawimawh khawp mai. Min rel tute, min hmusit tute tih let zel hi thlarau thianghlim dawng zia em, a thinlung thianghlim zia em?
Thlarau thianghlim chuan amah hawtu pawh a tawngtai sak thei tur a ni, amah itsiktu pawh, amah reltu pawh, a tawngtaisakin thlarau thianghlim a dawn ve theih nan te a dil sak zawk tur a ni. Nangman i tih thianghlim theihloh kha Pathian thlarau thianghlim chuan a tithianghlim thei a ni.
Thlarau thianghlim hi kan van mamawh em, thinlung thianghlimna i chan phawt chuan kohhranah hian nihna leh chanvo nei lo mah la, Lal Isua hminga i tih a piang chu rawngbawlna a ni tih hria in, chanvo kan in pekte hi a hlu a, vanram kaina a ni lo, nihna chanvo lian pui pui neih a, tih that peihloh hi a hlauhawm zawk, kan tih theih tawk tura angaih kohhranin min pe a, kan ngaihpawimawh thiamte hi avan pawimawh tak em.
Tlema kan lan ve na tur a awmloh chuan Pathian rawngbawl te hi kan peih lo anga, kan ti tha peih lo mai ang tihte ka hlau thin. Langsar vak lo pawh hian Lalpa rawng hi a bawl theih. Eng nge maw nihna in a pawhkal hram hram ringtu kan ni ang tih te a hlauhawm.
Eng nge rawngbawlna chu :- Thinlung thianghlim taka Lal Isua ropuina atana i tih apiang hi rawngbawlna chu a ni zawk. Thuthlungah ka luhpui ta che a, ka ta i ni ta e, tih hi Lalpa Pathian thuchhuak a ni. Thuthlungah min luhpuina hi a hlu em em a, chu mi hlutna chu kan hrefiah zo lo ang tih ka hlau thin.
Engtikah emaw chuan ila thi dawn, engtikah emaw chuan i khawvel ni hi ala kin dawn, tah chuan tuiah leh thlarauva i pian loh chuan Pathian ram i lut ve thei dawn lo.(Johana 3:5)
Chu thu chu hre reng mah ila ka khawvel tawp hun hi naktuk a nih hi kan la ring lova, nakumah kar leh ah ka ti tha ve tawh tak tak ang kan ti a, chu hun chu kan dam thleng dawn em tih kan hriat loh avangin tun hun ah hian Lalpa tan, kohhran tan, keima tan, Pathian hmu ve tura kan inbuatsaih a pawimawh tak zet zet a ni.
Mathaia 5:8 “Thinlunga thianghlimte chu an eng a thawl e; Pathian an la hmu dawn si a”. Lalpa tawk turin i thinlung ti thianghlim rawh.
Lalpan malsawm rawh se.
