Lalvensanga Chawngthu
President HQRS Bial PYD
Galatia 5:22-25 “Thlarau rah erawh chu hmangaihna te, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te, insumtheihna te a ni zawk e, chutiang kalh zawngin Dan thu pek reng a awm lo ve. Tin, Krista Isua mite chuan tisa chu, a sual ngaihtuahna leh a chaknate chawpin an khengbet ta. Thlarauva nung kan nih chuan Thlarauvah vek i awm leh bawk ang u.”
Tirhkoh Paula’n Galatia rama mite hnena lehkha a thawnah thlarau rah chi kua a hrilh a, chungte chu hmangaihna te, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te, insumtheihna te a ni a, hengte hi ringtute nuna miten an hmuh tur a ni.
Pathian thlarauvah kan tuiin thlarau lam buatsaihna pawh kan chang nasa a ni mai thei, Pathian thu hriat kawngahte kan sangin thusawi kan thiam viau pawh a ni thei e. Heng thlarau rahte hi kan nunah hmuh tur a awm loh erawh chuan ringtu ngaihtuahawm tak kan ni thei ang. Ringtute hian puitlin lam pana heng thlarau rahte hi kan nunah midangte hmuh theih turin neih kan tum a ngai a, tlarau rah a sawi te atang khian pahnih khat lek sawi zui ila.
1. Hmangaihna – Johana 13:24-25 “Thupek thar ka pek che u hi, inhmangaih ula, keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtirte in ni tih chu miah chuan an hria ang” a ti a. Lal Isuan thupek thar ka pe a che u tia a sawi chu inhmangaih tawn tur thu a ni a, Paula pawhin Thlarau rah a sawi zinga a hmasa ber chu hmangaihna a ni. Thlarau hruaia awm tawh, ringtute nunah chuan hmangaihna hi kan hmuh tur langsar tak pakhat a ni ngei ang.
Paulan, “Hmangaihnain a dawhthei a, ngil a nei bawk thin, hmangaihnain a itsik lo va, hmangaihna a infak lo va, a uang lo va, a che mawi lo lo va, mahni hma a sil lo va, a thinur duh lo va, sual lamah a ngaihtuah lo va, fel lohnaah a lawm lo va, thutak erawh chu a lawmpui thin” a tih ang hmangaihna hi nei theuh ila, chhungkua, kohhran leh khawtlang a hlimin a nuam hle ang.
2. Remna –Rom 12:18 “A theih phawt chuan nangmahni lam tal, mi zawng zawng nen inremin awm phawt rawh u” a ti a, Remna hi mitin mamawh a ni a, Pathian nena kan inkarah remna a awm a pawimawh a, chutiang bawkin kan mihring puite nena kan inkarah remna a awm a ngai bawk a ni. Chu remna chu Pathian thlarau changtute nunah chuan hmuh theihin a lo klang chhuak thin a ni.
Tirhkoh Paulan thlarau rah a sawi te zinga pakhat chu Remna hi a ni, thlarau changtu leh thlarau thilpekte dawngtu chuan kan kawppui te, kan chhungkua te, kan rawngbawlpui te leh kan thenawm khawvengte kan rem thei tur a ni. Miten min rem thei lo a nih pawhin keimahni lam talin rem turin Paula chuan ringtute a chah a, hei hi a taka nunpui tura kan inbuatsaih a tul hle a ni. Thlarau rah kan han sawi tlemte atang pawh khian kan zawm chuan miten kan nun ah eitur an hmu dawn a, chu chuan mi chaklo zawkte pawh chaknan anlo hman phah thei a ni. Lalpan malsawm theuh che u rawh se.
