Bro. Vanlallawma
Treasurer Tuikual South PYD
Sam 74:20“Thuthlung kha rawn pawisa ang che; Lei hmun thim laite chu nunrawnna awmnain a khat si a.“
He hla hi Asapha fate hla niin Asapha fate hi Levia chite an ni a, Temple a rimawi tum thin an ni a, (I Chro 25:2-3) he hla an phuah chhan ni a lang chu Babulon salah Pathian hnam thlan Israel-te atangin, Babulon hovin Temple-te tichhia in Pathian Biakna In te an hal bawk a, (Sam 74:7-8) Temple a rawngbawl tute that in a then an man a, anthah bang leh an man bang, a hmun lo nghakte zingah Asapha fate hi an tang niin a lang. Israel rama lo awm tan pawh Temple-ah rawngbawlna tur a awm chuang lova, rawngbawlsak tur mipui an awm chuang heklo, a khawharthlak hle awm e! Chuta mangang au rawl tawngtai hla a ni a, he hla hian a mi Israel te chu Thuro ah chanin an hmelma Babulon-te kutah chuan ti boral vek tura pe lo tur leh a mite rethei tak leh hrehawm/mangang taka an awm chu hriatsak tur te in anngen a, thuthlung mi annihna leh a thu a thlunna hnam an nih avang tal pawha an chunga zahngai tur in an mangang vawrtawp chuan Pathian nasa takin an au a.
He hla thu hian zir tur pawimawh tak min pe in ka hria, Pentecost mite kan Lalpa, kan Pathian Isua Krista’n a thuthlung keng tur leh puangdarh tur te, nunpui tur te in tun hunah hian min thlangin ruat bik kan ni a, nangmah lo tumah midang an awm chuanglo. He thuthlung hi engthilmahin thleng i phal lovin, engvangmah in chhuahsan i phal lovang u, mite ngaihin mifel, fak tlak, mi tha, ti a sawi kan hlawh kher lo thei, kohhranah kan phak tawk a tlemin, mite thawh leh tihtheih kan phalo pawh a ni thei e. Engpawhnise, Thlan kan luh pui tur atan Lalpa’n min pek he thuthlung hi i thlang tlat ang u.
Tunah hian Lalpa hmaah inlan dawn ila i thil lo tih tawhte, fel leh tha i intihna khan a thlamuanpui zo che em le? Lalpa hma ah dik leh famkimin i in hmu zo em le? Lalpa hma ah i felna leh i thlamuanpui tur chu thuthlung tho kha a ni si a. Pathian in a hmangaih chu a thuthlung hi a ni a, a thuthlung kengtu te chu a mi hmangaiha te chu an ni mai. Israel mite pawh hremin salah te tang thin mahse a thu a thlunna hnam an nih avangin a thiltihtheihna hmangin a chhanchhuak leh thin, a thuthlung kengtu hnam awmchhun an nih vang a ni. Damchhung khawsak eizawnna vangte, nupui pasal avang mai mai te, thildang engvangmahin he thuthlung hi i bosan lovang u.
Kan nghah kan Lalpa Isua lokal ni ah leh he khawvel kan chhuahsan a, a hma a ka inlan ve hunah chuan Asapha fate dilna ang hian Lalpa’n a ngaih pawimawh ber tur chu a thuthlung hi a ni dawn si a. Thuthlung kha rawn pawisa ang che. Lalpan malsawm rawh se
