Benjamin Vanlallawma
Sam 28:7 “LALPA chu ka chakna leh ka phaw a ni a; Ka thinlung hian amah chu a ring a, tichuan, puihin ka awm a; Chuvangin, ka thinlung hi nasa takin a hlim a; Ka hlain amah ka fak ang.“
Thuhriltu 3:1 “Engkim tan hian hun ruat a awm a, Van hnuaia thiltih zawng zawng tan hun remchang a awm.“
Bawhchhiatna tam takte avangin he kan khawvel hi nasa taka tihchhiatin a awm mek a. Lalpa ringlotute leh thuhriltu der thlengin an lo pung zel a. Heng zawng zawng hi hrilhlawkna thlenfiahna vek a ni. Amaherawhchu, a hun a thlen hma hi chuan mihringte hian kan Pathian remruat hi kan hre phak thin si lova, a bikin tunlaiah khawvel a changkan ang zelin kan Setana pawh a thawh dan a dang chho zel a. Ruihhlo leh nun khawlohna lam chu a hmanraw pui ber a ni nachungin, tha anga lang si, chhungril famkim lohnain min thlem a. Kan bula miten khawvel changkanna mila kalin hlawhtlinna an chang kan han hmu a, itsikna leh awhna sualah kan tlu a. Social media lahin thil tam tak kan hmaah awlsam taka hmuh theihin min dahsak a, a thatna chu a tam teh meuh mai. Mahse, a that lohna ken telte hi kan hawisan vek thei bik si lova, hei hian kan chhungrilah nasa takin hmun a khuar chho mek a ni.
Kan eizawnna, kan zirna, kan thiltih engemaw ten min bawhbuai chho zel ta zel a. Kohhran kan lo hlat leh thin a, hei hian kan nun mai bakah kan thlarau thlengin a tichhia a. Lalpa thuthlung neitute erawh chuan heng thilte hi inbawhbuai tir ve lo i la. A thuthlungah chauh hian a lo kal dawn si a, amah kan zawn hmasak chuan kan tana a hunruat nghak turin dawhtheihna leh nun hlimna kan neih phah ngei ang. “Engkim tan hun ruat a awm a” tih hian a hrilhfiah chiang khawp mai, mihring zawng zawngte hi Lalpan kan nun theuh kal dan tur, kan pianni atanga kan thihni thleng hian a ruatin a hre vek a, a remruata innghat ringtu kan nih chuan, a rawngbawl chunga tha thlah lova hmalam kan pan a tul a ni. Neih ve loh hlauhna thinlung hian kan nunah hmun a luah chho mek zel bawk a. Hei hi Setana hmanrua, rilru hrisel lohna lian tak pakhat a ni. Tute emaw Thailand, US leh ram hrang hranga an zinna kan han hmu a, kal ve chaknain kan khat a, keini lo chak ve ngawt lam kha a lo ni thin lova, kan tana a remruat a nih phawt chuan kan duh emaw duh lo emaw khawvel pawh min fanchhuah tir hial thei ngei ang. Kan tana rem aruat felsa si chuan, a lo thlen hun tur hrelo mah ila amah fak leh a rawngbawl chungin, theihtawpa hmalam pana a lo thlen hun nghah hi ringtute tih dan tur dik tak chu a ni. Vanduai bik riaua kan inhriat chuan kan vanduai bik kumkhua anga, vanduaina karah pawh a malsawmna chhiar thiam mi kan nih chuan nun a hlim a, Lalpa hi hlat tum pawh ni ila a theih thin loh. Amah chu kan chakna leh phaw atana kan hman tlat a, kan rin tlat chuan kan manganna karah pawh lawmna leh malsawmnain min lo vur leh thin.
Thuthlung fate tan chuan lungngaihna tur a awm lo. Kan rinnaah kan chian a, a remruat a kan innghah phawt chuan kan phurritte chu chhawkin kan awm ngei ang. Chuti ni lova, kan pensan leh si chuan kan chan tur chu eng nge a nih tih kan hre sa vek. Hei hi pumpelh theih a la nih lai hian pumpelh tum i la, kan chak loh hun te, kan bawrhsawm hun a lo thlen chang chauha a lam hawi lovin, kan awmna hmun leh kan thiltih apiangah mite zirtirtu leh an entawn kan nih fo hi a tul a ni.
Luka 21:33-ah, “Lei leh van a ral ang a, ka thu erawh chu a ral lo vang,” tih ziak a ni a. Lei leh van ral hnu pawha ral ve ngai lo tur, khawvel hun a danglam chhoh zel lai pawha danglam ve ngai lo chu chatuan hun hi a ni a. Ral leh tur he khawvel intlansiakna tam tak te ai chuan a thuthlung vuantu, amaha rinna nghat chunga vanduaina te, harsatna te tawn ngamtu kan nih hi chatuan nun kan neihna tur a ni.
Lal Isuan a lo sawi lawk leh a thupek Apostol-ten an lo tan tawh he chhandamna hi a kal zel anga, mi thianghlim lawr hunah a tawp dawn a, he hun a kal chhung hian a chhandamna chang tur hian kawng dang engmah zawh tur a awm lo. Chatuan nunna neihna tur chu Apostol-te hrilh zawm leh rin chiah kha a ni mai. Heng ang ni lo thuhril dan thar tam tak a lo chhuak ve zel bawk a. Thenkhat chuan kan Pathian hi “A pa” emaw “Fapa” tih ten an ko va, thuthlung dikah lut si loin felna ram chauhin rawng an bawl a. Englai mai pawha be pawp thei anga insawiin an kawng kal laite hian an phun mawlh mawlh a. Chung mite chu thenkhatin an han en a, an lo chak ve a, Setana hmanrua changkang tak pakhat angah a ngaih theih ang. Fiamthu thawh te pawh an ang lek lek thin. Hei hi a bikin tunlai thalaite zingah a hluar khawp mai.
Isuaah Pathian a famkim a ni tih kan rin chuan a thupek zawma amah nena inzawm tura tih kan ni a (Joh 15:5). Amah nena inzawm turin eng nge kan tih ve ngai ang? Thil tha tiha nun hmang tura hriattir kan ni leh bawk. Mahse thiltha tih chauh pawh hi a la tawk zo si lo, chhandamna dik tak tel lo chuan vanram a kai theih si loh. Vanrama lut ve tur chuan chhandamna kan chang anga, thil tha tihin kan chhunzawm tur a ni. A thihna, phuma a awmna leh a thawhlehna tawmpui nana Baptisma kan chan a, Thlarau Thianghlim kan chan bawk chuan keini aia vannei khawvelah hian an awm thei ngai lovang.
Lalpan malsawm rawh se
