B. MS Dawngliana
Fin.Secy Nursery PYD
Chhan leh vang awma inhmangaihna hian zawhna zawh sen loh leh chhanna chhan sen loh tam tak a hring chhuak duh khawp mai a, hriatfiah harsa leh rin leh rin loh thu hla lah a tam.
Zawhna hi mimal tin hian kan ngah khawp a, a then chu chhan theih mai a ni a, a then erawh zawhna a tawp ta; chhanna awm ta lo a ni. Heng zawng zawng hi nun ti famkim tu nge a nih ang a, famkim lo leh khingbai tlat a ni zawk, hrilhfiah harsa tak a ni. Pathian in min hmangaih em avangin kan tan thing lerah khai kân in a awm reng bawk a, chung zawng zawngah chuan eng thil nge kan nuna fiah ta ber a, mi khei zaktu ber chu ni ta ang? Hriatchian harsa tak a ni.
Thufingte 3:5-6 thu-ah chuan kan thinlung zawng zawnga Lalpa rin a tul thu leh mahni hriatna a innghat lo turin min ti a. Mahse rinna tak tak chu engtianga langchhuak nge maw ni ngai le! Pathian i ring em? tih zawhna hi ‘Ring e’ tiin a tawk mai a, hun kal zelah kan rinna tak tak hi fiah tlak a ni ang maw? Ringhlel chunga ring deuh deuh reuh, ring fumfe si lo, ringhlelh ngawt dawn a rin duh tlat bawk si. Ke veilam khaia dinglam lei rah, dinglam khaia veilam lei rah, nghet chuang si lo âwn deuh lam nei ang chauh kan ni mai lo ang maw! Ke ding leh vei hian lei chu rap chat mai ila âwn lam nei lovin nghet charhin a din theih a sin. Pathiana rinna nghat ti siin ringhlel deuh reuh a awm chu a ninawm in a thlamuanthlak famkim lo tawp ang.
“Kohhran hi ka hmangaih a ni” tia thu kan sawina zawnah hian miin damna nge an hmuha lawm lohna. Han ngaihtuah let mai mai chhin teh. Inthlahrung tak leh inkiltawih ru takin an lo awm reng a nge aw. An tana zah chem chemna turin tawngkam kan lo chhakchhuak palh hlauh ang e. Kolossa 4:5-ah chuan “Kan tawngka chhuak chu chia al khawngaihna tel ni fo rawh se” tiin min hrilh a nih kha maw. Khawngaihna nge khakna chhuak nasa zawk? Sawisel rengtu bulah nilovin fakna âwka chhuak ve thin te bulah hian a nia miin nuam an tih thin ni. Thufingte 16:28 thu-ah pawh “Tawng chaltlai mi chuan inhauna a thehdarh a, sêsêa thusawi hmangin thian bulte a ti then thin” a ti bawk a. Ekhai! mahni in enlet mawlh mawlh a, chhui kir zut zut ava awl duh ve. Kohhran ho thalai pawl ho-ah hian tawngkam hman fimkhur a tul zual hle mai.
He leia cheng leh khawsa kan ni a, van chaw sawi thin mah ila lei lam thil kan la rin miau avangin fimkhur tak chung pawhin rah pelh palh theih thil a tam ve bawk a nia. Chung zawng zawngah chuan kan fihlim lo a nih pawhin khawngaihna chunga khawngaih lehzualna hun min pekah hian bang lova intawngtai sak tawn thin tur kan ni reng a ni. Kohhran ho kan kal zelna tur atan hian ‘Vui pui theih loh’ ini teh ang u. A hahthlak a nia. Chumi chuan chumi chungchang chu chutiang chuan a sawi a tih vel mai mai hi sawi chiam chiam te ching lo ila. Kan kâ atang chuan chil leh Pathian thu bak hi i chhakchhuak vak lo ang u. A tawp ber atan chuan eng ang pawh a pangpar ngaina lo leh duh lo pawh nila i thian tha, i chhungte leh i thenrual ten i chungah pangpar dah tura lokalin ‘Mangtha’ tiin anla thlah dawn tho tho che. Chutiang chu kan hma hunah kan tawng teuh dawn, engpawh kan tih hi hmangaihna nena tih ni vek rawh se. Hlim tak leh lawm taka kan fak hla sak hi a tak ramah kan chen hun a la thleng ang a, chutih hunah chuan Van Lal Awi zo ve ngei turin kan theih lai hian inbuatsaih ang u.
Lalpan malsawm rawh se
